SuperDizionari

vignî daûr loc.v.

Vignî, movisi dopo di cdn. o di alc tal spazi

esemplis

"a vegnin daûr in procession lungje lis feminis vistudis di neri cu la velete o il façolet neri sul cjâf"

gjavât fûr di "Corpus Domini" di Pieri Somede dai Marcs

"«Volêso vignîmi daûr? Cussì o viodês di ce che si trate»"

gjavât fûr di "Prime di sere" di Carlo Sgorlon

vignî daûr loc.v.

Jessi o movisi cun cdn. o cun alc, cun sens di dipendence, di subordinazion e v.i.

sinonims

lâ daûr

esemplis

""Jo i vai. I clami in trê oris duta la zoventût da li vilis ca intor: Versa, Vila Sîl, Sant Laurins, Prodolon, Valvason. E che i fantats di Cjasarsa, cui che a voul, al mi vegni davour.""

gjavât fûr di "I Turcs tal Friûl" di Pier Paolo Pasolini

vignî daûr loc.v.

Vê un interès sentimentâl o sessuâl par cdn. e cirî di plasêi

sinonims

stâ daûr, lâ daûr

esemplis

"tu sês mate tu, ninine, / a vignî daûr di me! / Cuant che il mus a cjante gjespui / ancje jo ti sposi te!"

gjavât fûr di "Tu sês mate tu, ninine" di Popolâr

vignî daûr loc.v.

Tignî o mantignî alc o cdn. tant che esempli, vuide, pont di riferiment, element di interès e v.i.

sinonims

lâ daûr

esemplis

"che nus sedi vignude daûr cuasi la metât dai iscrits dal partît cun dirit di vôt ae Assemblee nol vûl dî che nus vignarà daûr ancje l'eletorât autonomist"

gjavât fûr di "Memoriis di politiche linguistiche" di Adrian Cescje

"une comunicazion fate ben e determine un grop di int che ti ven daûr, ti compre il prodot, ti sosten"

gjavât fûr di "Comunicâ la autonomie" di Sandri Di Suald

vignî daûr loc.v.

Capitâ daspò o in consecuence di alc

esemplis

"la sô nomine par une incjarie cussì impuartante e vignive daûr di une gnove situazion madressude intal moviment socialist furlan"

gjavât fûr di "Felix Marchi e il sium dal furlan-furlan" di Max Mauro

"al sta rivant il frêt e cun chel ducj i malans che i vegnin daûr "

gjavât fûr di "Une plante par medisine" di Fabian Ros

monolengâl